Löggæsla

Skipan lögreglu

Ríkið heldur uppi starfsemi lögreglunnar í landinu, sbr. 1. gr. lögreglulaga nr. 90/1996.

Hlutverk lögreglu er sem hér segir skv. 2. mgr. 1. gr. lögreglulaga:

  a. að gæta almannaöryggis og halda uppi lögum og reglu, leitast við að tryggja réttaröryggi borgaranna og vernda eignarrétt, opinbera hagsmuni og hvers konar lögmæta starfsemi,
   b. að stemma stigu við afbrotum og koma í veg fyrir athafnir sem raska öryggi borgaranna og ríkisins,
   c. að vinna að uppljóstran brota, stöðva ólögmæta háttsemi og fylgja málum eftir í samræmi við það sem mælt er fyrir um í lögum um meðferð opinberra mála eða öðrum lögum,
   d. að greiða götu borgaranna eftir því sem við á og aðstoða þá þegar hætta steðjar að,
   e. að veita yfirvöldum vernd eða aðstoð við framkvæmd starfa sinna samkvæmt fyrirmælum laga eða venju eftir því sem þörf er á,
   f. að starfa í samvinnu við önnur stjórnvöld og stofnanir sem hafa með höndum verkefni sem tengjast starfssviði lögreglu,
   g. að sinna öðrum verkefnum sem henni eru falin í lögum eða leiðir af venju.

1. Lögreglustjórinn á höfuðborgarsvæðinu fer með lögreglustjórn á svæði sem nær yfir Reykjavíkurborg, Seltjarnarneskaupstað, Mosfellsbæ, Kjósarhrepp, Kópavog, Garðabæ, Hafnarfjörð og Sveitarfélagið Álftanes.

2. Lögreglustjórinn á Suðurnesjum, sem jafnframt er sýslumaðurinn á Keflavíkurflugvelli, fer með lögreglustjórn á svæði sem nær yfir Grindavík, Sandgerði, Sveitarfélagið Garð, Reykjanesbæ og Sveitarfélagið Voga auk þeirra svæða á Suðurnesjum sem eru varnarsvæði samkvæmt varnarsamningi Íslands og Bandaríkjanna.

3. Sýslumenn með aðsetur á Akranesi, í Borgarnesi, í Stykkishólmi, á Ísafirði, Blönduósi, Sauðárkróki, Akureyri, Húsavík, Seyðisfirði, Eskifirði, Hvolsvelli, í Vestmannaeyjum og á Selfossi. 

Með lögreglustjórn í umdæmi sýslumannsins í Búðardal fer sýslumaðurinn í Borgarnesi, með lögreglustjórn í umdæmum sýslumannanna á Patreksfirði, í Bolungarvík og á Hólmavík fer sýslumaðurinn á Ísafirði, með lögreglustjórn í umdæmi sýslumannsins á Siglufirði fer sýslumaðurinn á Akureyri, með lögreglustjórn í umdæmi sýslumannsins á Höfn fer sýslumaðurinn á Eskifirði og með lögreglustjórn í umdæmi sýslumannsins í Vík fer sýslumaðurinn á Hvolsvelli. Umdæmi lögreglustjóra samkvæmt þessum tölulið skulu að öðru leyti ákveðin með reglugerð að fenginni umsögn viðkomandi lögreglustjóra og sveitarstjórna.

Dómsmálaráðherra er æðsti yfirmaður lögreglunnar.   Ríkislögreglustjóri fer með málefni lögreglunnar í umboði hans, sbr. 4. gr. lögreglulaga.  Aðsetur ríkislögreglustjóra er á Skúlagötu 21, Reykjavík. Verkefni ríkislögreglustjóra eru tilgreind í 5. gr. lögreglulaga.

Lögreglustjórar fara með stjórn lögregluliðs, hver í sínu umdæmi. Þeir annast daglega stjórn og rekstur lögreglunnar í umdæmi sínu og bera ábyrgð á framkvæmd lögreglustarfa innan þess sbr. 2. mgr. 6. gr. lögreglulaga en auk þess er þeim falin ýmis önnur verkefni í lögum svo sem yfirstjórn leitar- og björgunarmála á landi, sbr. 3. mgr. 6. gr. lögreglulaga. Þeir fara einnig með stjórn almannavarna sbr. lög um almannavarnir nr. 94/1962.

Frekari upplýsingar um lögregluna má nálgast á vef lögreglunnar.

Helstu lög og reglugerðir á þessu sviði:
Lög:

Lögreglulög nr. 90/1996
Lög um meðferð opinberra mála nr. 19/1991
Lög um almannavarnir nr. 94/1962

Reglugerðir:
05 Dómstólar og réttarfar
17 Löggæsla og almannavarnir
Reglugerð um björgunarsveitir.

Tengdar vefsíður:
Lögregluvefurinn
Ríkislögreglustjórinn
Lögreglustjórinn í Reykjavík
Dómsmálaráðuneytið
Hæstiréttur Íslands
Ríkissaksóknari

                                                                                                                                                                                                            ^{Uppf. 29.06.2007}