Einkennisfatnaður og merki sýslumanna

Í 4. mgr. 8. gr. laga nr. nr. 82/1989 um framkvæmdarvald ríkisins í héraði, sbr. 8. gr. laga nr. 24/2007, er kveðið á um að sýslumenn og löglærðir fulltrúar þeirra skuli bera einkennisfatnað eftir því sem ráðherra ákveður í reglugerð. Ákvæði um þetta er að finna í reglugerð nr. 480/2008 um einkennisfatnað og merki sýslumanna og löglærðra fulltrúa þeirra.

Samkvæmt reglugerðinni er einkennisfatnaður sýslumanna tvenns konar; annars vegar til nota við dagleg störf og hins vegar hátíðarbúningur. Þá er gert ráð fyrir sérstökum einkennisfatnaði löglærðra fulltrúa sýslumanna, sem í meginatriðum eru eins og einkennistanaður sýslumanna. Einnig eru í reglugerðinni ákvæði um sérstakar skikkjur til afnota við hjónavígslur.

Einkennisfatnaður notaður við dagleg störf	Skikkja til afnota               við hjónavíglsur	Hátíðarbúningur

Notkun einkennisfatnaðar sýslumanna

Um notkun einkennisfatnaðar sýslumanna gilda skv. reglugerðinni þessi ákvæði:

Einkennisfatnaði sem notast við dagleg störf skal skv. 10. gr. reglugerðarinnar klæðast sem hér segir:

1. Við hátíðleg tækifæri og meiri háttar viðburði í héraði, sem embættismaður eða fulltrúi hans, sbr. 2. gr., er viðstaddur stöðu sinnar vegna. 
2. Við hjónavígslur.
3. Við framkvæmd aðfarargerða utan skrifstofu sýslumanns.
4. Við framkvæmd bráðabirgðagerða utan skrifstofu sýslumanns.
5. Við öflun sönnunargagna vegna ætlaðra brota á hugverkaréttindum.
6. Við nauðungarsölur.
7. Við önnur verkefni utan starfsstöðvar þar sem embættismaður eða fulltrúi hans, sbr. 2. gr., kemur fram stöðu sinnar vegna.

Hátíðarbúning skal sýslumaður skv. 11. gr. reglugerðarinnar nota sem hér segir:

Sýslumaður skal nota hátíðarbúning við opinber og/eða hátíðleg tækifæri.  Hátíðarbúning skal nota við eftirfarandi athafnir:

1. Við heimsókn, móttöku og fylgd forseta Íslands eða annarra þjóðhöfðingja. 
2. Við hátíðleg tækifæri og meiri háttar viðburði í héraði, sem sýslumaður er viðstaddur stöðu sinnar vegna.

Sýslumanni er heimilt að nota hátíðarbúning við hjónavígslur.

Merki og einkenni sýslumanna

Í 3. gr. reglugerðar nr. 480/2008 um einkennisfatnað og merki sýslumanna og löglærðra fulltrúa þeirra segir um merki sýslumanna á einkennisbúningum þeirra:   

Merki sýslumanna skal vera gylltur munstraður hringur og er hluta af sverðsblaði með hjöltum stungið niður í hringinn.  Merkið skal vera 3,5 sm á hæð, breidd hjaltanna 3 sm, en hringurinn 2,5 sm í þvermál.  Sjá má merkið á myndinni hér fyrir neðan.  

Þess má geta að sýslumenn nota þetta merki sem merki félags síns, Sýslumannafélags Íslands. 

Um einkennishnappa segir í reglugerðinni að þeir skuli vera hringlaga, kúptir, gylltir með upphleyptri mynd af skjaldarmerki Íslands.  Hnapparnir skulu vera í tveimur stærðum. Minni gerðin skal vera 1,6 sm í þvermál en hin stærri 2,4 sm í þvermál.

Um axlafetil segir að hann skuli fléttaður úr gylltum borða upphleyptum, þverbryddur að ofan og framan og ganga borðaendarnir felldir undan fremri bryddingunni. Fetillinn skal vera u.þ.b. 3 sm breiður að ofan og tvöfalt breiðari að framan.