Þinglýsingar

- - - - -

Undantekningar:

Eigi skal greiða gjald fyrir þinglýsingu úrskurða um sviptingu sjálfræðis eða fjárræðis né úrskurða um brottnám lögræðissviptingar, sbr. 2. mgr. 8. gr. laga nr. 88/1991 um aukatekjur ríkissjóðs.

Hafi ráðsmanni skv. IV. kafla lögræðislaga nr. 71/1997 verið falin umsjón fasteignar, loftfars, skráningarskylds skips eða skráningarskylds ökutækis skal skipun hans þinglýst á viðkomandi eign. Ekki skal greiða þinglýsingargjald vegna þessa, sbr. 2. mgr. 40. gr. laganna.

Ef eign er seld við nauðungarsölu skal sýslumaður gera ráðstafanir til þess að um það sé getið á blaði fasteignar í fasteignabók. Hliðstæð skylda hvílir á skiptastjóra við upphaf gjaldþrotaskipta og opinberra skipta á búi og við upphaf nauðasamninga. Fyrir færslu slíkra tilkynninga skal ekki greiða þinglýsingagjald, sbr. 3. mgr. 25. gr. þinglýsingarlaga nr. 39/1978.

Þrátt fyrir ákvæði 8. gr. laga nr. 88/1991 um aukatejur ríkissjóðs skal ekki greiða þinglýsingargjald af skjölum sem stimpilfrjáls eru samkvæmt lögum nr. 132/2008  um breytingu á lögum nr. 36/1978, um stimpilgjald, með síðari breytingum (ákvæði til bráðabirgða sem gilti til 31. desember 2009).   Með lögum nr. 130/2009 var gildistími þessa bráðabirgðaákvæðis framlengdur til 31. desember 2010.   Samkvæmt ákvæðinu er einkum um að ræða skjöl sem fela í sér breytingar á skilmálum á fasteignaveðskuldabréfum einstaklinga eða ný veðskuldabréf, sem gefin eru út til uppgreiðslu vanskila á fasteignaveðskuldabréfum einstaklinga að því tilskildu að sömu aðilar séu að fasteignaveðskuldabréfinu og hinu nýja skjali.

Sé gerð skrifleg yfirlýsing um greiðsluaðlögun skv. 9. gr. laga nr. 50/2009 um tímabundna greiðsluaðlögun fasteignaveðkrafna á íbúðarhúsnæði skal henni þinglýst.  Fyrir þá þinglýsingu greiðist ekkert gjald.   

Samkvæmt ákvæðum 2. gr. laga nr.  49/2010 um breytingu á lögum um stimpilgjald, og lögum nr. 88/1991, um aukatekjur ríkissjóðs, með síðari breytingum skal ekki greiða þinglýsingargjald af skjölum sem stimpilfrjáls eru samkvæmt ákvæðum til bráðabirgða I–VI í lögum um stimpilgjald.   (Sjá umfjöllun um stimpilgjald hér)

- - - - -

Um greiðslu stimpilgjalds, sjá hér

Um greiðslu fyrir þinglýsingarvottorð / veðbókarvottorð, sjá hér